PSE-EE DONOSTIA

• Facebook
• Twitter
• Google +
• Pinterest

"Donostia Botanika" Hiriko Zuhaitzen Plan Zuzentzailearen izena da. Hiriko Parke eta Lorategi Saileko zerbitzu teknikoek ia bukatua dute jada.

"Dokumentu guztiz osatua da, Donostian ezaugarri horiek dituen lehena" aditzera eman du Carlos García Hiri eta Mantentze Zerbitzuetako zinegotzi sozialistak. "Donostiak zuhaitz-ondare aberatsa du, 146.710 ale, hain zuzen. Hori, ehunekoetan, hiriko azaleraren %60,7a da. Gure hiria, agian, penintsula osoan zuhaizti gehien dituen hiria da, txosten teknikoek diotenez. Zuhaitz horietatik ia 80.000 hirigunean daude, eta gainerakoak, inguruko basoetan. Aberastasun hori 325 espezietan banatzen da. Horietako batzuek aparteko balioa dute, eta, oro har, multzo osoak kontserbazio-egoera bikaina du".

Espezien arabera, platanoa da ugariena Donostian. Ondoren, urkia, ezkia, tamariza, lizarra, e.a. datoz. Bakar batek ere ez du gainditzen guztizkoaren %7a, eta hori Donostiak duen aniztasunaz mintzo da.

“Donostia Botanika” dokumentuaren helburua ez da soilik Donostia biodibertsitatearen eta aberastasun naturalaren ikono bihurtzea, baizik eta, baita ere, zuhaitzek, klima-aldaketara egokitzeko eta haren ondorioak arintzeko, duten zeregin garrantzitsua nabarmentzea, etorkizuneko belaunaldiei guk daukagun ondarea jasoko dutela bermatzearren.

“Donostia Botanika” hiriko zuhaitzen azterketa sakon batean oinarritzen da, indarrak, aukerak, gabeziak eta mehatxuak identifikatzeko egindako analisi batean. Azterketa horretatik abiatuta, 12 helburu nagusi ezarri dira, besteak beste, herritarren bizi-kalitatea eta osasuna hobetzea, airearen kalitatea hobetzea, klima-aldaketari aurre egiteko erresilientzia areagotzea eta zuhaitz-ondarea hobetzea. Helburu horiek lortzeko, 35 lan-estrategia eta 50 ekintza espezifiko daude, 2024tik 2034ra doazen hamar urteak hartzen dituen plan batean banatuta.

Juantxo Marrero Ekologia zinegotziak adierazi duenez, dokumentua sortzeko egindako lanaren arabera, "zuhaitzek hiriari egiten dioten onuraren balioa urtean ia 2,5 milioi eurokoa dela balioztatzen da, kontuan hartuta gaixotasunen eta heriotzen prebentzioan, berokuntzan eta aire girotuan, kutsaduraren murrizketan, airearen kalitatearen hobekuntzan eta uholdeen prebentzioan aurrezten dena. Naturan egindako inbertsioa da, oso mesedegarria, agerian jartzen dituena zuhaitzek hirietan sortzen dituzten onurak eta, aldi berean, Donostia nazio-mailako erreferente bihurtzen duena".

“Donostia Botanika” Planak honako hauek proposatzen ditu: inausketa, landaketa eta hiri-espazioen moldaketa modu berrietara egokitzea; zuhaitz apartekoak sustatzeko plan bat egitea, Donostiako zuhaitz-ondarearen balioa handitze aldera; eta zuhaiztien arriskua ebaluatzeko planak, bai eta mantentze bereizi eta jasangarrirako planak ere.

DOCUMENTACIÓN

• Sakatu hemen prentsa oharra irakurtzeko (PDF)